Մայիս 13-14-ը Վիեննայի Արվեստի պատմության թանգարանում տեղի ունեցավ միջազգային գիտաժողով «Մշակույթը հակամարտության մեջ. Հարավային Կովկասն այսօր» խորագրի ներքո։ Գիտաժողովի կազմակերպիչներն էին Զալցբուրգի համալսարանի հայագիտական բաժինը, Մայր Աթոռ Սուրբ Էջմիածնի Արցախի հոգևոր-մշակութային ժառանգության գրասենյակը, «Կապույտ վահան» միջազգային կազմակերպության Ավստրիայի մասնաճյուղը, «Ռոերիխի պակտ» ընկերակցությունը, Արվեստի պատմության թանգարանը և Արցախի հոգևոր ժառանգության պահպանության հարցերով Ավստրիայի կոմիտեն: Գիտաժողովի բացմանը հնչեց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի ողջույնի ուղերձը: Բացման խոսքով հանդես եկավ նաև Ավստրիայում ՀՀ դեսպան Արմեն Պապիկյանը: Բանախոսների շարքում էին «Կապույտ վահան Ավստրիայի» նախագահ Կառլ ֆոն Հաբսբուրգ-Լոթրինգենը, «Caucasus Heritage Watch»-ի հիմնադիր-ղեկավար Լոռի Խաչատուրյանը, Զալցբուրգի համալսարանի հայագիտական բաժնի ղեկավար դոկտ. Յասմին ԴումԹրագուտը, Հայաստանից ո աշխարհի տարբեր երկրներից ժամանած հայտնի փորձագետներ: Գիտաժողովի շրջանակներում՝ մայիսի 13-ին, Վիեննայի Մխիթարյան միաբանության վանքում բացվեց Արցախի հոգևոր-մշակութային նմուշներ ներառող «Ղարաբաղից՝ Վիեննա» ցուցահանդեսը: Ցուցադրվող նմուշների շարքում են Արցախում 17-րդ դարում գրի առնված հայկական բացառիկ ձեռագրեր, Շուշիում 19-րդ դարում տպված հայկական գրքեր, պարբերականներ, Արցախում գործված բարձրարժեք գորգեր: Ցուցահանդեսի բացմանը ներկա էին ավստրիացի պաշտոնյաներ, կաթոլիկ եկեղեցո հոգևորականներ, բազմաթիվ հյուրեր: